Kahayag

10

Dili malimtan ni alyas ‘Emil’ ang dulom niyang kinabuhi dihang nalulong pa kini sa ilegal nga droga.

Nag-edad og 27 anyos si Emil sa dihang una kini nakatilaw sa droga tungod sa hunghong sa mga barkada hangtud hingpit nahimong bisyo ang iyang curious sa droga.

Gitug-an ni Emil nga dakong porsyento sa iyang sweldo napadulong sa droga busa gamay na lang ang iyang matunol nga sapi ngadto sa iyang asawa nga nahimong hinungdan sa ilang panag-away.

Giingon ni Emil nga dunay mga panahon mahadlok siya mugawas sa balay o maglakaw-lakaw kay basin kuno sundan ug patyon siya sa DDS sama sa nahitabo sa iyang mga ig-agaw.

Kaniadto aktibo sa pagsimba si Emil uban ang tibuok niyang pamilya apan tungod sa droga tapulahaw nahimulag gikan sa presensiya sa Diyos ug napuyo sa ngitngit nga kinabuhi si Emil.

Gisaysay ni Inday (Asawa ni Emil) kung unsa na kadaot ang iyang bana ug gani piyaok na kaayo ang nawong ug payat na tungod sa paglunang sa droga.

Segun ni Inday, napasagdan ni Emil ang iyang pamilya nga nagtukmod kaniya aron musangko sa pakigbu-lag unta tungod dili niya kaya masud-ong ang kahimtang sa iyang mister tungod sa droga.

Apan tungod sa unom nila ka mga anak nasanta ang plano ni Inday ug gi-unungan lamang niini ang iyang mister hangtud nahitabo ang kausaban ni Emil.

Nahinabi sa RMN DAVAO Si Barangay 9-A Kapitan Tata Llubit ug siya nagsulti nga labad sa iyang dapit ang mga adik sama ni Emil tungod kay matag karon og unya nagpasiugda og kagubot sa ilang dapit.

Gani makapila na ka higayon gireklamo sa barangay si Emil tungod sa mulo sa iyang mga silingan diin matud ni Kapitan Llubit kung dili magwala makigsumbagay sa iyang mga barkadang adik pod.

Dihang gilusad ang Oplan Tokhang sa kapulisan usa si Emil nga boluntaryong mitahan ug napailawom sa rehabilitasyon program sa barangay.

Suma ni Kapitan Llubit, usa sa nakapa-usab sa kinabuhi sa mga drug surrenderees sama ni Emil mao ang pagtambong sa religious activity nga gilusad sa tulo ka relihiyon sama sa evangelical.

Ang pulong sa Diyos maoy nagpa-usab sa kinabuhi ni Emil nga kun kaniadto miserable ug walay direksyon apan karon ang dalan nga adunay kahayag maoy ginabaktasan karon niini.

Busa walay sukod ang gibating kalipay ni Inday sa kasauban nga nahitabo kang Emil karon ug gani gipasi-garbo pa niini ang ilang pagbalik sa pagsimba uban sa unom nila ka mga anak dili sama niadto nga layo sila sa presensiya sa Diyos.

Mga kasama, labihang kadako sa gugma sa Diyos alang natong mga makasasala diin ang bugtong niyang Anak nga si Hesu-Kristo gitugyan aron ilansang sa krus aron ikaw ug ako maluwas gikan sa silot sa sala ug mahatagan og kinabuhing walay katapusan.

Ang kausaban sa kinabuhi ni Emil buhing saksi nga ang Diyos padayon naghatag og kahigayonan sa matag usa nga makakaplag sa dalan sa kahayag sa matarong nga kinabuhi nga dili angay isalikway sa tanan.

RadyoMaN Joel Viray

Facebook Comments