Isa ka kalabera sang tawo ang nakita nga nagabitay sa puno sang Lunok sa Barangay San Miguel, Buenavista Guimaras sang nakaligad nga adlaw.
Suno kay Police Major Ahlie Estember, hepe sang Buenavista PNP nga mga alas 2:30 sang hapon sang Domingo nga adlaw sang masapwan sang duha ka lalaki nga nagapangita sang DUGOS ukon honeybee ang nasambit nga kalabera.
Sa pagpangusisa sang kapulisan, nahibaluan nga ang nasambit nga kalabera ginapatihan nga si Felix Piodena alyas Jun-jun base sa mga nabilin nga panapton nga ginsuksok sini.
Dugang ni Estember nga base sa pahayag sang pamilya, ulihi nga nakita si Piodena sang Disyembre 3, 2018 kag pagkatapos hinali na lamang ini nga nadula.
Ginapahayag nga may problema sa pamilya ang biktima nga ginapatihan amo ang nagtulod nga magbitay ini sa puno sang Lunok apang wala gid makita kag sang nagligad lang nga adlaw nasapwan sang duha ka lalaki.
