Pagadian City – Gideklara sa Zamboanga del Sur Provincial Police Office nga hapsay ug malinawon ang kalag-kalag sa 26 ka lungsod ug usa ka syudad sa probinsya.
Kahinumdoman nga ang kapulisan mipailawom og “full alert status” isip kabahin sa martial law.
Gibutyag ni Provincial Police Director Allan Nazarro nga mitak-op ang paghandom sa adlaw sa mga minatay nga walay natalang krimen sa probinsiya.
Hugot nga gidili sa kapulisan ang pagtagay og ilimnong makahubog sa sementeryo apan di kalikayan nga adunay moadto nga hubog nang daan.
Hinuon walay nasikop nga dautang elemento ang kapulisan. Gitataw ni Nazarro nga “generally peaceful” ang probinsiya sukad Oktubre 31 hangtud kagahapon Nobyembre 2.
Gihulagway niini nga nahimong mingaw ang pagsaulog sa kalag-kalag sa publikong sementeryo sanglit gidili ang mga sound machine.
Sa katapusan, gipasalamatan ni Nazarro ang katawhan nga mihatag sa ilang kooperasyon maong malinawon ang adlaw sa mga minatay.
