Davao City – Naglusad ang Public Safety and Security Command Center (PSSCC) og bomb drill sa duha Ka sam-ang kagahapon sa hapon.
Matud ni PSSCC chief retired AFP Major General Benito De Leon nga gisugdan ang simultenous bomb drill sa Davao Memorial Park ala 1:30 sa hapon samtang ala 1:35 sa Bunawan Public Cemetery.
Milangkob sa simultaneous bomb drill ang Davao City Police Office, Task Force Davao, Bomb Squad, Bureau Fire Protection, mga volunteers ug uban pang grupo sa pagpanguna sa PSSCC.
Segun ni PSSCC operation chief retired police Superintendent Angel Sumagaysay nga unang senaryo ang pagbusikad sa Improvised Explosive Device (IED) nga gitanom kunuhay sa mga terorista.
Sa mao kunuhay nga sitwasyon, daghang mga tao nga miduaw sa duha ka sam-ang ang naigo.
Busa paspas sab miresponde ang joint effort sa mga awtoridad sa pagresponde sa duha ka sementeryo aron sapupuhon ang mga naigo sa bomba.
Base sa inisyal nga assessment ni De Leon nga nakitaan og kapaspas ug kaandam ang mga partisipante sa pagresponde sa duha ka lugar apan duna lamay dyutay palambuon pa kung asa sila nagkuwang.
Ang pagbusikad sa mga IED sa duha ka sementeryo nakapaalarma sa mga tao nga naa sa palibot nga masayod sa simultaneous bomb drill.
RadyoMaN Joel Viray
