Davao City – Namatikdan sa katawhan karon nga daghan sa mga kandidatong wala mosunod sa kamandoan sa COMELEC nga dili mamilit og campaign materials nga wala sa common posters area.
Kini human nagbansiwag ang mga nawong sa mga kandidato sa mga kahoy, mga poste, waiting shed, ug uban pang lugar nga hugot gidili sa kalagdaan sa Omnibus Election Code.
Tungod niini, nakaani og pagsaway gikan sa mga botante ang mga kandidato sa Barangay ug SK Election tungod sa wala pagtamod sa simpleng mando sa balaod sa piniliay.
Pero wala na matingala niini si Ateneo de Davao University (ADDU) Blue Vote Head Mark Samonte sa kalapasan sa mga kandidato tungod kay sukad pa kaniadto wala man gayod silay respeto sa balaod sa COMELEC.
Hangtud karon nagpakita lamang ang mga kandidato nga wala gayod silay igong hanaw sa balaud sa COMELEC sanglit kun nasayod pa lang unta sila sa limitasyon ug unsay gidili wala untay mga posters magbansiwag gawas sa common posters area.
Gumikan niini, panahon na nga gun-ubon ang ingon niining klase nga kinaiya sa mga nagpapili sa bugnong lugaynon kansang mga batasan nga dili kamao mutamod sa simple nga reglamentos.
Ang limpyo ug tawhay nga piniliay manukad kini sa maayo nga pamatasan sa mga kandidato ug sa mga botante usab kay kun walay ingon niini nga hiniusang tinguha, halayo ang gipangandoy natong malinawon nga eleksyon karong Mayo 14.
RadyoMaN Joel Viray
