Malay, Aklan — Uwa eon it kabuhi tag makit-an ro sangka eaeaki kahapon sa mabukid nga parte it Poblacion Malay, Aklan.
Ro biktima nakilaea kay Als April Solano, 29-anyos ag residente man it nasambit nga lugar.
Suno kay PO2 Gerald Ilig it Malay PNP nga ko May 6 ginpa record it pamilya ko biktima ro anang pagkaduea kung sa siin ulihi imaw nakita nga nagbakae pa it sigarilyo ag uwa eon makauli.
Nasayuran nga ko May 4, hay nakitaan ro biktima it kakaibang hueag nga bukon it normal para kanda.
Ag kahapon May 9 hay nagpa record man sa Malay PNP si Daryl Quinton matapos nga makita na rong bangkay it biktima sa mabukid nga parte.
Nasayuran pa gid nga rayang biktima hay dating naga trabaho sa sangka construction site sa banwa it Balete, ag tag idto imaw hay haeos nga uwa raya nagakaon kaon rason nga ginpauli eonlang sa banwa it Malay ag dikato nasayuran nga may ginabatyag eon ro biktima.
Kombinsido man ro pamilya nga uwa it foul play sa kamatayon it biktima.
