Davao City – Usa sa gituhuang rason sa pagtaas sa teenage pregnancy dinhi sa dakbayan sa Davao mao ang kalisud nga nasinatian sa katawhan diin sagad niini nga daghan sa mga miyembro sa pamilya wala na maatiman ingon man napasagdan na sa ilang mga ginikanan.
Sumala ni Nanet Aparece, barangay health worker sa Brgy. 23-C Mini Forest Boulevard, sagad sa hinungdan sa sayo nga pagkabuntis sa mga kabatan-onan mao nga napasagdan sa mga ginikanan ang ilang mga anak ug na-impluwensiyahan sa barkada lakip ang mga bisyo sa pag-inom ug uban pa.
Matud ni Aparece sa mga sayo nga nagbuntis sa linghod nga pangedaron, lisod nga mahimong inahan diin ang ginikanan na usab ang mamroblema sa gidangatan sa ilang mga anak.
Apan alang kang Nenita Abajero, barangay health worker sa Brgy. 37-D, nga usa sa hinungdan sa mga kabatan-onan nga sayo ang pagkabuntis mao ang posibleng pagkalambigit iligal nga druga.
Gipasabot ni Abajero ngadto sa tanang ginikanan nga ang ilang responsibilidad mao ang pagbantay ug pagmatuto sa ilang mga anak aron dili mabiktima sa sayo nga pagkabuntis.
RadyoMaN Don Pulayao
