General Santos City–Gipalawman pa sa Tupi PNP ang ilang imbestigasyon kalabutan sa napatay nga suspek nga si Reylan Katag, 20 anyos, nga nanimuyo sa Sitio Bunoan, Polunoling, Tupi Sot.Cot . kansa napusilan patay sa otoridad human nga misukol ala 1:00 ang takna sa sayong kabuntagon niadtong milabayng adlaw Dominggo.
Sumala pa ni Police Captain Samuel Bascon Jr. ang hepe Sa Tupi Municipal Police Station nga ilaha pang ginasuta kung unsa gayud ang motibo sa suspek nganong deretso kini misulod sa bunkhouse sa compac og gikuha ang armas sa iyang sakop.
Saysay man usab sa opisyal nga ilaha usab sutaon kung unsa gayud ang tinuod nga nahitabo niadtong higayona nganong nakasulod ang nasampit sa lugar nga usa man kadto ka Police Detachment.
Dugang pagbutyag ni Police Captain Samuel Bascon Jr. nga sumala pa sa iyang mga sakop nga kalit matud pang misulod ang suspek sa bunkhouse sa Compac agi sa likod nga bahin pinaagi sa pagguba sa kural nga kawayan.
Saysay man usab sa opisyal nga sa dihang nakadungog og saba sa likod nga bahin ang pulis nga nakaduty niadtong panahona iyaha matud pang gisuta kung unsa kadto apan nakurat na lamang ang pulis nga iyang nakita nga bitbit na sa suspek ang armas og uban pa nilang gamit. (Reynald Timario)
