Davao City- Kamatayon lang sa tanang sakop sa teroristang Maute Group ang makahatag og hingpit hustisya sa mga kabanay ug mga biktima sa Roxas Night Market Bombing.
Sumala ni Industrial Security Focus Focal Person Chito Gerbolingo nga dili pa igo nga nakasuhan ug na-preso ang pipila ka sakop sa pamilyang Maute ug bugtong kamatayon sa mga terorista ang tinood nga hustisya nga posible makahupay sa gibati sa mga biktima ug sa mga kabanay.
Ang pagkaguba sa Marawi City karon gumikan sa pag-ataki sa Maute Group walay kalainan sa kamatayon sa 15 ka tawo ug pagkasamad sa kapin 70 ka tawo dihang gibombahan ang Roxas Night Market 2016.
Ang mga tawo sa Marawi City ug mga kabanay ug mga biktima sa night market bombing daw manag-susama ra ang gipangandoy nga hustisya kansang kamatayon sa mga terorista maoy matood nga hustisya.
Diin ang pagdumdom sa Roxas Bombing karong adlaw’ng Sabado kun Setyembre dos mas mupalig-on pa sa panawagan sa katawhan diha sa padayon nga pagkondena sa Maute Group.
Kung aduna man daw kuno’y leksyon nga makutlo sa paghinumdom sa Roxas Bombing kini mao ang pag-pasidaan sa tanan nga dili gayod magkumpiyansa inay kanunay alerto aron masanta ug mabatukan ang terorismo.
Ug kung wala man la’y importante lakwon mas maayo magpuyo na lang sa balay apan kung dili malika-yan nga mugawas, dili sipyaton ang pagpaniid sa palibot aron kung adunay mamatikdan nga kadudahan nga lihok gilayon mutaho sa mga otoridad aron masanta ang teroristamo nga binuhatan sa Maute Group.
Kasamang Joel Viray
