Tampakan, South Cotabato–Nagpadayon pa ang imbestigasyon sa Tampakan PNP kalabutan sa pagpusil patay sa mag-uuma nga si Ronald Hambala,hingkod ang pang-idaron, nanimuyo sa Prk.Maligaya, Brgy.Poblacion, Tampakan, South Cotabato kansa gipusil sa wala pa mailhing suspek niadtong adlaw’ng Martes alas 5:30 sa hapon sulod mismo sa iyang panimalay.
Pagbutyag ni Police Captain Joseph Villanueva, hepe sa Tampakan MPS nga sa pagkakaron wala pa silay matumbok nga suspek sa krimen bisan pa man dunay mga witness nga nakakita tungod dili pa sila makahatag ug impormasyon ngadto kanila sa rason nga anaa pa sa trauma ang mga nakakita.
Apan gipaklaro sa opisyal nga usa sa pinakaduol nga motibo nga ilang nakita sa kamatayon sa biktima ang dunay kalambigitan sa droga gumikan kay kanhing surrenderee ang nasampit ug wala man usab kini nakalaban basi usab sa pamahayag sa pamilya.
Kahibaloan nga magbisbis lang unta sa iyang tinanom ang biktima dihang gisulod kini sa suspek sa panimalay ug diretso pusil sa makadaghang higayon sa ulo ug sa lawas nga hinungdan sa iyang kamatayon. (Reynald Timario)
