Nagapati si Jail Supt. Vicente Papelera, warden sang BJMP Ungka nga bangungot ang rason sang kamatayon ni Jimboy Chavez.
Si Jimboy Chavez sang Tanza Baybay, City Proper napreso bangod sa kaso sa iligal nga droga.
Suno kay Papelera, sa selda 9 sa diin nahamtang si Chavez, may isa nga nagabantay kon nagakatulog na ang tanan agud mamonitor sa ila katulugon.
Antes gindala sa ospital kag gindeklara nga patay, nakita sang nagabantay nga naga-ugayon si Chavez kag nagakumod.
Ginpukaw pa nila ini apang wala gid nagabugtaw kag wala gid nagasabat gani ila gintawag ang nagabantay agud madala sa ospital si Chavez.
Madumduman nga si Jimboy Chavez ang suspek sa ginbuy-bust nga White House sa Molo sa diin gin-aresto ini sang controversial nga police officer nga si Tagle.
Nagapati naman ang pamilya nga may foul play sa kamatayon ni Jimboy Chavez.
