Davao City – Patay ang 3 ka managsuon sa nahitabong aksidente tali sa usa ka motor ug 10-wheeler dump truck sa Purok 7, Barangay Magdug, Governor Generoso (GovGen), Davao Oriental pasado ala-1 kagahapon sa hapon (Abril 14, 2021).
Sa interbyu sa DXDC RMN Davao kang Police Staff Sergeant (PSSg) Ramil Antatico, traffic investigator sa GovGen Municipal Police Station (MPS), gibutyag niini nga 5 ang angkas sa motorsiklo nga mao ang inahan nga si Mary Rose Mamada ug anak niining sila Princess Kate ug Prince Carl Mamada, 5-anyos (kambal), Marian, mag 2-years old, ug Princess Mae, 14-anyos.
Naila ang driver sa motorsiklo nga si Ace Paña, uyoan sa mga menor, pulos residente sa Brgy. Surop Baraca, Governor Generoso, Davao Oriental. Samtang, naila usab ang driver sa dump truck nga si Jefrix Palmera, 30-anyos, taga Caraga, Davao Oriental.
Saysay ni Antatico nga nag-abot ang duha ka sakyanan sa usa ka blind curve sa maong barangay road ug didto na naligiran ang mga biktima diin dead on the spot ang kambal nga menor de edad, dead on arrival ang si Marian ug nakahiagom og minor injuries ang nahibiling sakay.
“Siguro ang motor gikan sa iyahang lane sa right side pagkakita niya sa dump truck milihis siya sa wala. Siguro mulikay siya unya mura’g maabtan na man gyud siya. So, iyaha na lang gitumba daw. So ang kadtong dump truck nga nakasulod na kay nagbulagaan lagi sila. Naka-brake siguro ang dump truck pero wala na, napasok na ang motor, nalatayan gyud sila sa ligid sa dump truck,” saysay sa traffic investigator.
Matud sa pulis, andam matud pa ang management sa dump truck nga musuporta sa panginahanglan sa mga biktima.
Kasong Reckless Imprudence Resulting to Multiple Homicide ang atubangon sa driver sa dump truck apan wala pa nasayran kung kini iduso sa kabanay sa mga biktima.
Pahimangno sa GovGen MPS sa mga motorista nga kanunayng mag-amping sa biyahe ug pag-secure og lisensya ug rehistro sa gidalang sakyanan diin nasayrang wala nagbaton niini ang motoriklo.
RadyoMaN Kirby Manzon
