Padayon ang hugot nga pagmonitor sa Department of Labor and Employment kon DOLE batok sa end of contract kon endo.
Sa interview sa RMN Malaybalay ngadto kang DOLE Undersecretary Joel Maglunsod, gibutyag niini nga aduna nay mga kompanya nga ilang gi-isyuhan ug non-compliance order ug aduna nay mga pending nga mandatory conferences.
Gani epekto niini sigun ni Maglunsod, nga nahimong regular ang 6,000 ka mga empleyado sa Jollibee.
Matud niini nga aduna silay mga gipangsusi karon nga angayang unahon.
Apil usab sa ilang gitutukan ang mga plantasyon workers sama sa katubhan diin adunay mga gikataho nga nakasupak sa labor laws.
Samtang adunay ongoing na usab nga compliance order ngadto sa banana plantation.
Gidugang ni Maglunsod nga apil sa ilang gimonitor ang mga malls, food chains, hotel and restaurants, BPO ug uban pa.
Gipaningkamutan matud pa nila nga maubsan ang ihap sa endo kung dili man hingpit nga ma papas ila kining ma-regulate.
Una nang gikadismaya sa Kilusang Magbubukid ng Pilipinas ang wala pagpirma ni Pangulong Duterte sa usa ka executive order aron mabatukan ang contractulization ug endo.
Matud ni Antonio Flores ang secretary general sa KMP atol sa interview sa RMN Malaybalay nga kalit lang nausab ang desisyon ni Pangulong Duterte nga dalion ang draft sa EO aron batukan ang endo human nakigtagbo kini sa mga employer.
