Dimataling, Zamboanga del Sur – Mas gipahingusgan sa tropa sa kapulisan sa lungsod sa Dimataling ang kampanya sa pagbutang sa’clean rider sticker’.
Gi-agda sa kadumalahan sa Dimataling Municipal Police Station ang mga lumulupyo sa nahisgutan nga lungsod pahimuslan ang kahigayunan nga makabaton sa libreng Clean Rider Sticker.
Subling gipasabot sa otoridad nga tumong sa maong kampanya nga nakaltasan ug kun mahimo hingpit nga masumpo ang pag-pangatake sa mga riding in tandems.
Hinoon boluntaryo lamang matud pa ang papatapot sa sticker ug dili pugson ang motorista sa pagbutang niini.
Ang motorsiklo nga may gipapilit nga clean rider sticker mas dali ra nga makalusot sa mga checkpoint ug dili usab mamahimong suspek ang rider kun ugaling dunay krimen sa ilang lugar.
Subling gipatin-aw sa PNP Dimataling nga libreng makuha ang mga sticker kun dal-on lang sa ilang stasyon ang mga motor ug ipakita ang orihinal resibo ug certificate of registration niini.
Sa nahipos usab nga impormasyon sa RMN-DXPR News Team nang-apud-apod usab sa susamang sticker ang ginsakpan sa Pitogo PNP nga gipangunahan ni PSI Augustus Rosendo.
