President Roxas, Capiz – Natigayon nga marekober sang mga katapo sang 61st Infantry Hunter Battalion Philippine Army ang mga importante nga dokumento kag mga kagamitan matapos ang engkwentro kontra sa grupo sang rebelde nga New Peoples Army sa Barangay Bayuyan, President Roxas, Capiz kahapon sang aga. Sa interview sa battalion commander sang 61st IB nga si Lt. Col Joel Benedict Batara, nagdugay sang 20 tubtob 30 minutos ang bayluhanay sang lupok halin sa duha ka grupo kun sa diin nagpapalagyo ang mga ginapatihan rebelde nga NPA padulong sa area sang Badiangon President Roxas samtang ang iban ang padulong sa porsyon sang Sara, Iloilo. Suno pa kay Batara, mga katapo sang Sangay sa Partido sa Platoon (SPP)-East, Komiteng Rehiyon – Panay ng CPP-NPA nga ginapamunoan ni Liberato Palencia ukon Prudencio Samson alyas Guning ukon alyas Tikoy ang ila naka-engkwentro nga ginabanta indi magnubo sa 15 tubtob 20 ka bilog. Samtang matapos ang clearing operation, narekober naman sang militar ang ginapahayag kampo sang mga ini nga amo ang ginahiwatan sang mga seminar kag paghanas sa mga posible recruits sang NPA. Samtang kalakip sa mga narekober ang isa ka portable generator, duha ka sako sang bugas, mga personal nga kagamitan, isa ka multi-media projector, duha ka hand grenades, walo ka rifle grenades, isa ka anti-personnel mine, apat ka mga back packs, cellphones kag iban pa nga mga importante nga mga dokumento. Ginapatihan nga may yara sang napilasan sa hanay sang rebelde bangud man sa tinulo sang mga dugo nga nakit-an sa lugar. Nahibaluan nga antes sini, may nakit-an na nga presensya sang armado nga kalalakinhan sa nabukid nga bahin sang amo nga barangay kabangdanan nga nagpatigayon sang tactical operation ang militar. Samtang bangud sa serye sang lukpanay, temporaryo anay nga ginpa-untat ang klase sa Bayuyan Elementary School.
