Ato na usab nga handumon ang adlaw sa mga patay, ang tinuig nga paghandum sa mga namatay natong minahal sa kinabuhi.
Kini usab ang panahon nga magkita-kita ang mga sakop sa pamilya ug kaparyentehan, nga anaa sa laing lugar.
Alayon sa paghandum, mohimo usab sa pagdagkot og kandila ug paghalad sa bulak inubanan sa pag-andam sa pagkaon sama sa biko, suman, puto og uban pang hinam-is.
Matud ni Father Fermin Tan ang Parish priest sa Mt Carmel Parish Church sa Camaman-an, nga ang kandila nagsimbolo sa kahayag nga maoy giya paingon sa atong labaw’ng makagagahum.
Samtang ang Bulak nagsimbolo sa pagmahal sa mga buhi ngadto sa mga namatay na nga sakop sa pamilya o banay.
Dugang pa ni Father Tan, nga ang kandila ug bulak pulos simbolo lamang apan ang pinaka-importante mao ang pag-ampo niadtong mga namatay na.
