Dipolog City – Gihikay karon sa mga police investigator ang kaso nga ikiha batok sa usa ka kanhi kapitan nga gipasanginlang nanion og armas de fuego ngadto sa iyang igsuon sa miaging gabii didto sa Purok Morning Star, Barangay Olingan dakbayan sa Dipolog.
Subay sa nahipos nga report sa Dipolog City Police Station, ang kanhi kapitan sa Barangay Olingan nga si Juanito Bonucan Cabale, 70 anyos, ang naaresto dihang nangayo og police assistance ang igsuon nga si Ramonito Cabale, 63 anyos.
Si SPO4 Jerry Buhisan maoy nanguna sa pagresponde sa dapit nilampos sa pagsikop kang Juanito ug naimbargo nila ang usa ka norinco kalibre .45 nga pistola, dunay serial number 905907, kargado og upat ka buhing bala.
Migawas sa imbestigasyon sa kapolisan, pasado alas 7:00 sa gabii bispiras sa pasko nagkalalisay ang magsuon nga nisangpot sa pagpanion sa armas.
Sa dihang gipangitaan sa dukomento sa armas ang kanhi kapitan, nasuta sa mga police investigator nga expired na ang papeles niini, igon man expired sab ang permit to carry firearms outside of residence.
