Patay ang 28 anyos nga kanhi estudyante sa Mindanao State University (MSU) Marawi Campus atol sa engkwentro sa militar, pasado alas-4:00 sa hapon niadtong Biyernes, Enero 24, sa mga daluna sa Balindong ug sa Piagapo sa Lanao del Sur.
Matud pa ni Colonel Jose Maria Cuerpo, commander sa 103rd Infantry Brigade, Philippine Army, si Jarir Usman, residente sa Barangay Raya Saduc, Marawi City, namatay atol sa 15 minutos nga pinusilay tali sa iyang grupo ug sa mga tropa sa 82nd Infantry Battalion.
Nagpahigayon og operasyon ang militar niadtong higayona human madawat ang impormasyon nga adunay mga armadong lalaki, nga gituohang mga sakop sa Dawlah Islamiya ISIS, ang miabot sa dapit dala ang mga supplies, matud pa ni Cuerpo.
Gi-babagan sa militar ang mga posibleng dalan sa mga armado nga paingon sa bukirang bahin sa Balindong ug sa Piagapo kung asa nahitabo ang engkwentro.
Walay puwersa sa gobyerno nga nasamdan sa maong pinusilay ug posibleng dunay mga samaran sa mga armado tungod sa mga dugo nga nakita sa dalan nga posibleng gi-agian sa mga armado sa ilang pagsibat.
Si Usman naila pinaagi sa identification card o ID dihang estudyante pa kini sa Mindanao State University Marawi campus.
Nakalatid sa iyang ID nga mikuha kini sa kursong BS o Bachelor of Science in Management.
Sa impormasyon nga nakuha sa militar, mi-gradwar si Usman niadtong tuig 2015.
Miingon si Cuerpo nga nahinabi niya ang mga ginikanan ni Usman ug mitug-an nga kapin duha ka tuig na kini nilang wala nakita hinungdan nga nagtoo si Cuerpo nga membro na kini sa grupo sa wala pa ang Marawi siege.
Nakuha gikan sa encounter site ang M16 rifle nga gituohang iya kang Usman, upat ka mga improvised explosive devices o IEDs, duha ka kilo nga mga chemicals nga isagol sa pagbuhat og bomba, mga magazines sa M16 nga puno sa bala, mga personal nga gamit ug mga subversive documents o mga dokumento nga adunay “high intelligence value”. (Divina M. Suson,)
