Andam nga ipadaplin ni kanhi Gobernador Lito Osmeña ang iyang adbokasiya kalabot sa pagpatuman sa pederalismo dinhi sa Pilipinas, basta lang amendahan sa kongreso ang economic provisions sa 1987 Constitutions.
Nagtuo si Osmeña nga kini igo na aron molambo ang ekonomiya kun hatagan ug higayon sa gobyerno ang mga langyaw nga kapitalista nga makapanag-iya gyud ug yuta ug kompaniya dinhi sa nasud.
Matod sa kanhi gobernador nga samok ug kuti ang pag-usab sa batakang balaod ug dili usab niya buot nga makiglalis sa mga irrelevant nga butang.
Gihupay usab ni Osmeña ang kabalaka sa uban nga hayan mominus ang ilang kahigayunan nga makapanag-iya ug yuta, tungod kay duna na may mga kapitalista nga mas datu ug adunahan kanila.
Hinoon, kun ipadayon gyud sa administrasyon ni presidente Rodrigo Duterte ang pag-usab sa panggobyerno dinhi sa nasud ngadto na sa pederalismo, siya nagtuo nga makabenepisyo gihapon niini ang mga Sugbuanon.
Gusto usab niya nga molangkob sa mga wisemen nga maoy mopanday sa bag-ong konstitusyon, tungod kay dako siya ug ikatabang aron sa pag-umol sa economic policy sa nasud.
Apan kung si kanhi Chief Justice Hilario Davide III ang pangutan-on, kalbaryo ngadto sa mga Pilipino ang pagpatuman sa pederalismo.
