Kanhi nailang Commander Bravo nga si Abdullah Macapaar hingpit nang nahimong Peacebuilder gikan sa pagka combatant

49

Hingpit na’ng nahimong ‘peacemaker’ ang kanhi kumander sa combatant sa Moro Islamic Liberation Front, nga si Abdullah Macapaar, kinsa nailang si Commander Bravo.

Matud pa ni Col. Alex Aduca, deputy commander sa 2nd Mechanized Infantry Brigade, Philippine Army, nakita nila ang transformation ni Bravo atol sa pagsugod sa Brigada Eskwela sa Department of Education sa Lanao del Norte niadtong Lunes, May 20.


Si Macapaar, kinsa kumander sa MILF Bangsamoro Islamic Armed Forces Northwestern Mindanao Front 102nd Base Command, natudlo ug nanumpa niadtong Marso isip miyembro sa parliyamento sa Bangsamoro Transition Authority sa bag-ong gobyerno nga Bangsamoro Autonomous Region in Muslim Mindanao o BARMM.

Naila na kini karon nga si Hon. Assadulah Macapaar.

Atol sa Brigada Eskwela niadtong Lunes didto sulod sa kampo niini sa Kura-kora sa Barangay Tamparan, sa lungsod sa Munai, gihubo ni Macapaar ang iyang camouflage combat uniform aron isuot ang puti nga tshirt nga DepEd nga dunay disenyo sa Brigada Eskwela.

Sa iyang mensahe, nagpasalamat si Macapaar ngadto sa gobyerno, pinaagi sa Armed Forces ug sa DepEd, sa paghatag sa serbisyo sa Edukasyon ngadto sa mga kabataan sa ilang dapit.

Gi-rekognisar ni Macapaar ang kamahinungdanon sa edukasyon ngadto sa mga kabataan.

Matud pa ni Aduca, gikalipay nila ang maong kalamboan tungod kay nakaalayon kini sa gusto ni Presidente Duterte nga pagkab-ot sa tinud-anay nga kalinaw sa Mindanao ug sa tibook nasud.  (Divina M. Suson)   
*photo credits to the owner

Facebook Comments

From Advertisers