Bag-o lang niretiro nga opisyal sa Bureau of Jail Management and Penology nadakpan sa entrapment operation sa Criminal Investigation and Detection Group -7 tungod sa pagpangilkil.
Ang nadakpan nailhan nga si Jail Supt. Priscillana Gilboy samtang apil sa nadakpan ang iyang bayaw nga si Fatima Gilboy.
Ang kanhi opisyal sa BJMP gireklamo sa usa ka aplikante sa BJMP nga gipangayoan ug dakung kantidad alang sa pagpaubos niini ug neurological exam isip requirement sa pag-apply aron mahimong jail guard.
Nasayran nga si Gilboy maoy in-charge sa Neurological Exam sa mga aplikante alang sa pagka-jail officer dili lang sa mga aplikante sa BJMP region 7 kun dili apil na usab sa rehiyon 6 ug 8.
Ang pangu sa Criminal Investigation and Detection Unit sa CIDG-7 nga si Chief Inspector Chuck Barandog nibutyag nga P30,000 ang gipangayo ni Gilboy sa biktima apan nagkauyon sila nga unhan lang una kini ug P20,000.
Gihimo ang entrapment operation sa CIDG-7 sud sa usa ka dakung mall sa Barangay Mabolo sa dakbayan sa Sugbu ug nadakpan gyud si Jail Supt. Gilboy apil na ang bayaw niini .
