Nipasaka og kasong libel si kanhi PBA player ug karon Commissioner sa Philippine Sports Commission Ramon Fernandez, batok kang Philippine Olympic Committee (POC) president Jose “Peping” Cojuanco Jr., sa Cebu City Prosecutors Office. Kini gumikan sa giingong alegasyon ni Cojuanco batok kang Fernandez atol sa usa ka interview sa usa ka pamantalaan niadtong Marso 6 ning tuiga.
Matod ni Fernandez, nga si Cojuanco mipasangil kaniya nga “game-fixer” sa dihang miduwa pa siya sa PBA.
Nasayran nga sa wala pa masang-at ang libel nga kaso, daan nang nagbinayloay og mga mahait nga pulong silang Fernandez ug Cojuanco, tungod sa mga kritisismo sa kanhi PBA player batok sa liderato ni Cojuanco sa POC.
Ang abogado ni Fernandez nga si Atty. Ramsey Quijano, nipasabot hinoon nga dinhi nila gisang-at sa Sugbo ang kaso, tungod kay niabot man sa lalawigan ang publication sa pamantalaan ug dinhi man sa Sugbo nagpuyo ang iyang kliyente.
Andam hinoon si Fernandez nga isibog ang kaso batok kang Cojuanco, apan sa kondisyon nga kini mohimo og public apology ug kinahanglan nga mo-resign kini sa iyang pwesto.
Gawas niini, plano usab sa kampo ni Fernandez nga mosang-at og graft charges batok kang Cojuanco, tungod sa mga anomaluso niini nga transaksyon ug basi na sab sa mga report gikan sa COA.
