Alabel, Sarangani Province—Patay ang kanhing Barangay Kagawad human kining gipusil sa wala pa mailhing suspek alas 5:45 ang takna sa hapon didto sa may Purok Favila, Barangay Bagacay, Alabel, Sarangani Province.
Biktima giilang si Romulo Teo, hingkod ang pang-edaron, residenti sa Barangay Kihan, Malapatan, Sarangani.
Nasayran nga gikan sa sentrong bahin sa lungsod sa Alabel ang biktima angkas sa motorsiklo sa iyang apo dihang kalit lang silang gitaparan sa wala mailhing suspek samtang nagsubay sa dalan sa Barangay Bagakay.
Gipusil sa mga suspek ang biktima igo sa iyang likod nga bahin nga hinungdan sa iyang kamatayon.
Pamahayag sa usa sa mga apo sa biktima, wala silay nasayran nga dunay kalaban ang ilang apohan. Gani usa ka maayong tawo sumala pa ang biktima.
Iyang giangkon nga ayha pa nahitabo ang pagpatay aduna nay nadawat nga bahad sa iyang kinabuhi ang kanhing Barangay Kagawad apan wala niini gidetalye kung si kinsa ang nagbahad kaniya.
