General Santos City—patay ang usa ka 49 anyos nga lalaki human gipusil sa wala pa mailhing suspetsado, sulod mismo sa ilang panimalay sa Purok 11-c, Barangay Fatima Gensan, alas 8:39 ang takna kagabie.
Biktima giilang si Taharodin Salik Tiban, 49, residenti sa nasampit nga lugar. Subay sa pahayag sa pagumangkon sa nahisgutan nga si Razul Salik, nanihapon matud pa ang biktima dihang kalit lang misulod ang usa ka lalaking naka-helmet, nakajacket ug itom ug anaa sa 5’7” ang gitas-on niini.
Kalit gipusil ang biktima pila ka higayon igo sa ulo nga bahin. Paspas nga misibat ang suspek human sa insidenti samtang ang biktima, wala na nadala pa sa ospital human nakaangkon ug duha ka mga samad saw ala nga bahin sa iyang ulo.
Basi sa inisyal nga imbistigasyon sa Police Station 7, kanhi nang drug surfacing personality ang nahisgutang biktima. una na kining mitahan sa iyang kaugalingon niadtong June, 2016 dungan sa paglingkod ni Pangulong Rodrigo Duterte.
Sa karon nagpadayon pa ang gihimong imbistigasyon kalabutan sa maong insidenti.
