General Santos City–Takdang pasakaan ug kaso ang suspetsadong si Roland Bacalso, legal age, nga taga brangay West Gensan kansa suspek sa pagpanunggab sa biktimang si Vergilio Luganao, 37, residenti sa San Vicente, Silway West, Gensan niadtong nakalabayng adlaw.
Sumala ni Police Inspector Allan De Guzman, OIC Chief of Police sa Police Station 1 nasayran nga ayha nahitabo ang insidenti adunay nakalaban matud pa ang suspek didto sa maong lugar.
Niuli ang nasampit ug nikuha ug kutsilyo dayon nibalik apan tungod wala na ang iyang nakalaban ang biktima na nuon nga si Luganao ang iyang gipahimungtan pinaagi sa pagdunggab sa iyang dughan.
Dugang pagbutyag ni PCI allan De Gusman, nga walay atraso ang biktima sa suspek sanglit nadamay ra gyud kini sa kapungot sa suspek ngadto sa iyang nakalaban.
Padayon pa karon nga gipangita sa kapulisan ang suspek kansa nag-tago tago hangtud sa kasamtangan.
Samtang sa karon giandam na sa mga imbistigador sa Police Station 1 ang kasong ipasang-at batok sa suspek.
Ilang gihuwat sa kasamtangan mao nalang ang affidavit sa biktima aron nga hingpit na gyud nga mapasang-at ang kaso batok sa suspek.
