Polomolok, South Cotabato— Giplanuhan na sa pamunuan sa Polomolok PNP nga himuong isolation facility ang kanhing estasyon sa kapulisan nga nahimutang sa Barangay Poblacion Polomolok. Kung mahitabo nga modaghan ang ihap sa mga pinirisong magka Covid 19, dinhi nila ibutang ang ubang positibo.
Nasayran nga unang gipailawom sa RT-PCR test ang kapin 40 ka mga piniriso sa Polomolok Municipal Police Station human nasuta nga ang uban kanila nagpositibo sa Covid-19. Gibutyag ni Police Captain Romel Hitalia-Deputy Chief sa Polomolok PNP, gawas sa 15 ka mga pulis nga nagpositibo sa swab test aduna usay unom ka piniriso ang nahimong positibo.
Sumala ni Hitalia nga gihimo nila ang lakang nga mapailawom sa swab ang mga personahe sa kapulisan og mga piniriso human nga usa sa ilang mga sakop ang nakasinati og hilanat. Gikanayon hinuon ni Capt. Hitalia nga anaa sa maayong kahimtang ang panglawas sa mga nagpositibong pulis og preso apan kasamtangan silang naka-isolate. Ginapaabot nalang usab karon sa Polomolok PNP ang resulta sa uban pang mga na-swab aron masayran kung kinsa pa positibo og kinahanglang i-isolate. (JB)
