Gitapokan nan mga residente sa Purok-2 Barangay San Juan, Alegria, Surigao del Norte, an isa ka-American Citizen na nanhatag nan 500-kabuok na libre na mga eyeglasses para sa mga katiguyangan sa amu na lungsod, kagaina buntag. An kano nakilay- an na isa ka David Cooper, residente nan Pennsylvania, USA, kun diin isa sija ka kanhi Professor sa isa ka kolehiyo sa America. Si Cooper usab an Presidente nan isa ka organisasyon na Mars Centennial Lions Club, kun diin sila an nagpahigayon nan mga programa para sa katawhan sa Pennsylvania, na may 37-ka-mga miyembro. Sa eksklusibo na pakighinabi nan RMN Surigao kay Cooper, sija milaong na ija gidaya an programa sa ila organisasyon dire sa probinsiya tungod kay an ija asawa taga Alegria man.Gi-planohan isab ni Cooper na sila mupadajon sa paghatag nan mga ‘eyeglasses’ sa iban pa na lugar dire sa Mindanao, apil na an Surigao City ug iban pa na mga lungsod sa probinsiya. Isa si Mr.George Arcaya, kanhi SK chairman sa San Juan , Alegria SDN an boluntaryo na mitabang kay Cooper, sanan mibutyag na sila an libre mitabang sanan miasister kay Cooper tungod sa kaboutan og kamanggihatagon nan ini para maserbisyohan an katawhan. Sumaya pa na nakita ni Cooper an kalisod nan mga residente sa Alegria, partikular na an mga katiguyangan kun diin biskan pagpa-check-up ra gani sa ila mga mata dili pa mahimo kay lajo an mga Optical Center sa lungsod. Ugsa, sija na mismo an nagdaya nan kalamdag para sa mga residente sa Alegria. Gipaklaro isab ni Cooper na an mga lente sa mga eyeglasses an ija na gipa-lantaw sa mga eksperto adiser nija ini gipanhatag sa mga hingtundan na residente.(RadyoMaN Winston Ensomo)
