Davao City – Gibati karon og tumang kahiubos ngadto ni Pres. Rodrigo Duterte ang mga nag-invest sa Kabus Padatoon Community Ministry International Incorporated (KAPA) ni Joel Apolinario ug sa uban pang investment schemes gumikan sa mando sa nahauna nga pasirad-an tungod kay kadudahan kaayo ang paghatag og dako nga tubo sa gibutang nga kapital sa mga tawo.
Daghan sa mga naapektuhan nikonsidera nga ‘anti-poor’ ang direktiba ni Duterte ngadto sa NBI ug CIDG nga siraduan ang buhatan sa mga iskema partikular ang KAPA.
Apan gidepensahan karon ni Department of Interior and Local Government (DILG-XI) Regional Director Alex Roldan ang pamuno-nasud gikan sa batikos ug pagsaway sa mga tawo sa katarongan nga responsibilidad sa gobyerno nga mapanalipdan ang interest sa katawhan aron dili sila mailad sa mga iskema nga nangbutho karon.
Gitataw ni Roldan nga walay questionable investments nga molungtad og dugay diin mayabo ra kini sa ngadto-ngadto gumikan kay dagku ang interest nga gipanaad ngadto sa tawo diin subay kini sa atong nasinatian sa kaso sa Jacama, Legacy, Aman ug uban pa nga parehong nanirado ug wala mabayri ang mga nag-invest niini, butang nga dili buot mahitabo sa pangulo sa mga investors karong panahona.
Sa gihimong pakigsusi sa Anti-Money Laundering Council kun AMLAC, nasuta sa DILG nga walay record ang Bangko Sentral ng Pilipinas (BSP) nga may negosyo ang KAPA sukwahi sa ilang gisabwag sa publiko nga kaya nilang mubayad og pilo-pilo nga tubo tungod sa nasangpit nga mga pamatigayon.
Ug kini nagpasabot nga ang gikuhaan og pundo aron makabayad ang KAPA sa ilang gipasalig sa mga tawo kwarta ra sab gikan sa mga bag-ong sulod ug dili sa giingong mga negosyo nga maoy ilang gibandilyo aron makumbinser ang mga tawo nga mobubo sa ilang kapital.
Gikwestiyon pa niini ang tiunay nga motibo sa mga iskema sama sa KAPA sa kataoungan nga kung aduna gayod sila’y pagpanglantaw sa pagtabang sa mga tawo nan nganong wala nila gihimong legal ang ilang mga kumpanya pinaagi sa pagkuha og lisensiya gikan sa Securities Exchange Commission (SEC).
Matud ni Roldan, malisud ang hangyo sa ubang investors nga lugwayan hangtud sa Disyembre karong tuiga ang pagpasirado sa mga iskema aron unta makuha pa nila ang ilang kapital uban ang interest.
Pahimangno ni Roldan ngadto sa mga tag-iya og investment schemes nga dili musuway og sukol sa gobyerno aron dili sila dakpon ug pasakaan og kaso hilabi na nga padayong gipailawom sa martial law ang Mindanao.
Kahinumduman nga nahagit si Duterte sa pagpasira sa mga investment schemes tungod sa pangutana ni Pastor Apollo Quiboloy atol sa iyang programa sa television Biyernes sa gabii sa miaging semana kung unsay masulti niini sa pagdawat og donasyon nga may tubo nga 30 porsento sa grupo ni Apolinario.
RadyoMaN Joel Viray
