Military, PNP gakatawa!
Giisip nga kalampusan sa padayung security operations sa PNP ug AFP ang kapakyasan sa rebelding New Peoples’ Army (NPA) nga makapahigayun ug dakung programa ug assembliya atol sa ika 49 nga anibersaryo niadtong Marso 29 ning tuiga, dungan sa kasaulogan sa Huebes Santo.
Gitumbok ni PCSupt. Noli Romana, PNP Caraga Reg’l Director nga ang padayung operasyon sa kasundaluhan ug kapulisan maoy nakapugung sa mga NPA nga makapahigayun ug programa sa ilang anibersaryo sukwahi sa mga nilabay nga katuigan.
Mao usab kini ang nahimong assessment ni Major General Ronald Villaueva ang commanding general sa 4th Infantry Division, Philppine Army, kinsa mihatag usab sa timeline karung tuiga matapos na ang insurgency problem sa rehiyun.
Gipalig-on sa PNP ug AFP ang focus nga operasyon hinungdan nga nakontrola ang mga rota nga maoy agi-an sa tanang supplay ngadto sa NPA.
Tungod niini padayun ang panawagan ni PCSupt. Romana ngadto sa mga anaa sa armadong kalihukan nga mosurender sa goberno aron maangkon nila ang tinoud nga kalinaw.
Gipaniguru usab sa opisyal nga himoon ang tanan sa goberno aron masuportahan ang nag-unang panginahanglanon.
Sukwahi sa unang gipahayag sa Police Regional Office (PRO 13) nga pakyas ang ika-49 nga anibersaryo sa New Peoples’ Army, apan gipasigarbu gihapon sa walhung grupo ang malampuson nilang anibersaryo.
Kini ang gibutyag ni Ka Oto, spokesman sa Guerilla Front 16A sa NPA sa gibasa niining sulat pamahayag ni Ka Ariel Montero ang tigpamaba sa North Eastern Mindanao Regional Command.
Sigun ni Ka Ariel Montero nga malamposong nadepensahan sa Bagong Hukbong Bayan (BHB – NEMR) ang pagpangataki nga gihimo sa mga militar ug malamposon nilang napanalipdan ang katawhan batok sa mga kasundaluhan.
Nasayran nga mokabat sa 180 ka opensibang aksyong militar sa miaging tuig ang ilang nahimo nga mikalas ug 147 ka mga kaaway. Samtang sa unang quarter ning tuiga nakahimo sila ug 32 ka aksyong militar nga mikalas ug 25 kabook sa mga kaaway.
Sa maong operasyon nakakuha silag ubay ubay nga mga pusil nga igong maka armas sa dul-an usa ka kompanya sa Pulang Mangugubat.
Sa pikas bahin gibutyag ni Ka Oto nga walay ilang gihimong hiniusang pagsaulog sa ilang anibersaryo sa usa ka lugar kon dili gisilibrar nila kini matag Guerilla Front subay sa order sa ilang kadagkoan tungod usab sa hugot nga operasyong militar taliwala sa ilang gibuhiang deklarasyon nga hunong boto atol sa pagsaulog sa semana santa.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
