Tampakan, South Cotabato- Mukabat sa kapin 10 mil ka punuan sa marijuana ang gipang-ibot sa otoridad sa may boundary sa Sitio Alyong sakop sa Barangay Danlag, Tampakan, South Cotabato ug Sitio Lamalis nga sakop sa Barangay Datal Blao, Columbio, Sultan Kudarat.
Una nang nakadawat ug impormasyon ang Tampakan PNP bahin sa marijuana plantation sa lugar mao nga gilayon nilang girespondihan uban ang mga personnel sa South Cotabato PNP, Regional Mobile Force Battalion, Sultan Kudarat PNP, 27th IB ug mga barangay officials sa Barangay Danlag.
Wala na naabtan pa sa kapulisan ang responsable sa pagtanum sa maong marijuana nga gibana-banaang anaa sa P400,000.00 ang kantidad.
Samtang gumikan sa gilay-on sa lugar, didto nalang gisunog ang mga marijuanang gipang-ibot aron dili na mapuslan pa, samtang pipila lang ka punuan niini ang gibitbit sa otoridad aron gamiton isip ibidensya sa pagpasang-at ug kaso sa suspetsadong responsable sa pagtanum niini.
