Davao City – Mokabat sa 143 ka pamilya ang gihikling sa evacuation centers tungod sa pagbaha nga nasinatian sa Bunawan, Davao City tungod sa pag-overflow sa Bunawan River niadtong Lunes (Abril 26, 2021).
Sa interbyu sa DXDC RMN Davao kang Alfredo Baloran, hepe sa City Disaster Risk Reduction and Management Office (CDRRMO), gibutyag niini nga sa ilang record anaa sa 658 ka indibidwal ang naapektuhan sa pagbaha ug gina-validate usab ang maong ihap sa City Social Welfare and Development Office (CSWDO).
Bisan pa man, mapasalamaton gihapon si Baloran nga walay natalang injured, missing o casualty tungod sa insidente. Giingon ni Baloran, sagad apektado kadtong mga anaa sa ubos nga bahin sa barangay nga daling maapektuhan panahon sa pag-overflow sa sapa.
“Kanang lugara gud, ubos gyud na siya nga dapit, kadtong mga purok nga naapektuhan sa may bandang Bunawan labi na gyud kung magsugat ang tubig sa dagat, high tide unya naa pud ‘tong tubig nga gikan sa bukid, mag abot sila. Mao gyud nang isa nga cause sa flooding,” saysay ni Baloran.
Nasayrang naguba usab ang tulay sa Purok 1, Mahayahay, Barangay Bunawan, human nga midahili ang yuta nga gitukuran tungod sa walay undang nga pag-ulan.
Padayon ang panawagan sa CDRRMO sa katawhan nga kanunay’ng mag-igmat labi na nga padayon pang masinatian sa syudad ang mga pag-ulan tungod sa localized thunderstorms.
RadyoMaN Kirby Manzon
