Laing mga langyaw na usab ang niduaw sa probinsya sa Sarangani pinaagi sa mga Hapon gikan sa Japanese Society for Preservation of Birds gipangunahan ni Takashi Fuji, ang secretary general og maoy research manager.
Anaa sila sa Sarangani aron personal nga lantawon ang Usa ka Gatus ka Libo (100,000) kapin ka mga banog gitawag nga “migratory raptor” samtang namahuway og naglupad-lupad sa kawanangan sa lungsod sa Glan partikularminte sa Barangay Cross og sa Barangay Rio del Pilar una pa hingpit nga mupadulong sa nasud Indonesia.
Kini nga klase sa mga langgam ang gikan pa sa nasud Taiwan og Japan, og kay bulan naman sa Septembre og Oktubre, panahon kini sa ilang migration kon pagbalhin sa laing lugar tungod sa pag-usab sa klima.
Gikan Taiwan, naog sa Pilipinas, agi sa Luzon, lahos sa Visayas og Mindanao, sa Glan, abot sa Indonesia, balik napud sa Taiwan.
Kung si Bing-Bing Coray, residente sa Sityo Bul-anon sa Rio del Pilar, Glan ang paisturyahon, daw galilo nga gabuhawi ilang makita sa kalangitan kung muagi na sa ilang lugar ang linibo ka mga migratory raptor.
Kini ang lain na usab nga eco-tourism sa Sarangani Province, hilabi na sa Glan, sa pagpanguna nila Governor Solon og Glan Mayor Tata Yap, og suportado nila Senador Manny og Congressman Ruel Pacquiao, Vice Governor Elmer De Peralta, mga board member, og sa pag-ayuda sa Raptorwatch Network Philippines gipanguluhan ni Attorney Alex Tiongco.
Nipadayag na sa ilang tabang ang mga Hapon nga muhatag og ayudang pinansyal aron ma-preserba ang kalasangan sa Mount Latian nahimutang sa Glan, Malapatan, Alabel og Malungon nga maoy gina-istaran sa maong mga langgam.
Nihatag pud ang mga Hapon ngadto sa Kapitolyo sa Sarangani og mga teleskopyo gitawag nga “binocular” tag-Kinse Mil ka pesos (P15k) matag usa aron dul-it nga makita ang klase-klase nga banog.
Ang mga banog ang gi-konsidera nga “natural pest control” ilang ginakaon ang mga gadaot sa agrikultura sama sa insekto og ilaga.
Nagpasalamat na lamang si Japanese Research Manager Fuji og ang iyang kauban nga si Riyoh Murofushi tungod sa mainiton nga pagdawat ngadto kanila. First time matud pa nila nga niari sa Sarangani Province og nakita unsa kanindot ang lugar og kamaayo sa mga Sarangan.
