General Santos City—Mukabat sa 23 ka mga pamilya ang nagpabilin sa barangay gym sa Labangal, human sila mihikling tungod sa nasinatiang baha sa ilang lugar miaging gabii, kung asa gipang-anod ang ilang mga panimalay.
Kini ang gikumpirma sa RMN ni Kapitan Lorelie Pacquiao, kung asa sagad sa mga nahisgutan ang gikan sa Prk. Balunto. Gilayong gihatagan ang mga apektadong pamilya ug tig-P2,000 nga financial assistance, ug dugang hinabang samtang nanghikling.
Kahibaluan nga dul-an P200,000 ang natala nga damyos tungod sa nasinatiang baha dinhi sa dakbayan. Base sa report sa City Disaster Risk Reduction and Management Office, mukabat sa 23 ka panimalay nga duol sa makar River ang nadaot ug gianod sa baha.
Samtang, mukabat sa 95 ka tawo ang apektado nga pulos mga residente sa Purok Placida, Brgy Calumpang, ug sa Purok Roberto ug Balunto sa Brgy Labagal nga duol sa nasampit nga sapa.
Dungan niini, gihingusgan ni Kapitan Pacquiao nga dili na nila tugtan nga makabalik ang mga apektado nga pamilya pa sa mga kanhi nilang pinuy-anan duol sa sapa nga delikado sa baha. (Emir Bariquit)
