South Cotabato – Nagpadayon ang gihimong imbistigasyon sa Tampakan PNP aron masayran kung si kinsa ang nanag-iya sa plantasyon sa marijuana nga nakaplagan sa boundary nga bahin sa lungsod sa Tampakan ingon man sa Davao del sur.
Nasayran nga anaa sa 20,000 ka punuan sa marijuana ang narekober sa kapulisan inabagan sa mga personahe sa PDEA Regional office-12 ug sa mga opisyal sa barangay sa utlanan nga bahin sa Sitio Alyong, Brgy. Danlag, Tampakan ug sa Sitio Sayawag, Kiblawan, Davao del Sur.
Basi sa imbistigasyon nga gawas sa 20 mil ka punuan nga nakaplagan, adunay nakit-ang timailhan nga bag-uhay lang nagharvest ang nagtanum niini gumikan sa agi sa giibtan sa punuan sa marijuana.
Human nakaplagan gisunog dayon sa awtoridad ang maong mga marijuana samtang pipila niini ang gidala sa Police Station sa Tampakan aron himuong ebidensya sa pagpasang-at ug kaso sa wala pa mailhing nagpaluyo sa pagpananum ug marijuana sa maong lugar.
