Kapin 30 ka estudyante nga nalanag sa pastil naka-recover na

Davao City – Naka-recover na ang kapin 30 ka mga estudyante sa kolehiyo sa Guzman St.,Brgy.13-B, Davao City human giingon nga nalanag sa gikaon nga pastil ug gipangdala dayon sa hospital tungod sa pagsakit sa tiyan, pagsuka ug pagkalipong niadtong alas 4:00 sa hapon Oktubre 23, 2023.

Sa interview sa DXDC RMN Davao kang Police Captain Rizalito Clapiz lll, Deputy Chief sa Sta. Ana Police Station gisulti niya, 32 tanan ka mga estudyante ang nalanag, 18 ang nagpa-check up sa clinic ug 14 ang gipangdala sa San Pedro Hospital.

Segun ni Clapiz, sa 14 ka estudyante nga nadala sa hospital, 6 niini ang naadmit apan nakagawas na kagahapon Oktubre 24, 2023 ug hingpit na nga nakarecover.

Dugang ni Clapiz, subay sa ilang gihimong imbestigasyon nasayran nga ang nagbaligya sa maong pastil atbang lang sa ilang tulonghaan ug buntag pa kini gibaligya ug udto na gikaon, pagka-alas 4:00 sa hapon aduna nay gibati ang mga estudyante.

“Pagkaon atong gibaligya hygiene dapat ta tapus lotuon og tarong and then kadtong mga pan-os na nga pagkaon di na ibaligya dayon bahaw na dili na dapat ibaligya”,sulti ni Clapiz.

RadyoMaN Don Pulayao