Kapin 30 kasako sa basura nakolekta sa pagpahigayon nan Coastal Clean Up sa Brgy. San Juan, Surigao City
Moabot sa kapin 30 kasako sa basura an nakolekta sa tagpahigayon na coastal clean up sajo kuman buntag sa Brgy. San Juan, Surigao City. Ini pinaagi sa pagpanguna nan Surigao Youth Convergence sa koordinasyon sa RMN DXRS, JCI Surigao Wensie, Surigao Youth Volunteers, Youth Parish Ministry, Altar Servers, Surigao Maradjao Rovers, Bugsay Maradjao, motorcycle club ug iban pa.
Namahayag an nanguyo nan Surigao Youth Convergence na si Raxiey Adolfo, tuyo ka tuig na nila na tagpahigayon an coastal clean up ug tumong an paglimpyo sa kilid nan kadagatan. Tagtudlo na an aktibidad, kabahin sa adbokasiya sa paghatag proteksiyon sa kinaiyahan lakip an tinguha na balik na limpyo na makaliguan nan publiko pareho sauna na taghimo nan mga milabay na henerasyon an kilid sa baybayon. Sunod na higayon an isunod nila an laing coastal clean up sa may City Boulevard.
Nagpaabot nan pasalamat si Brgy. Kapitan Monina Caluna sa tanan na mga miapil sa coastal clean up na kon diin didto taghimo sa ila barangay sa San Juan. Tagtudlo pa, sila isab sa brgy. an may regular na coastal clean up na taghimo pero balik-balik ra pagdagsa an basura gikan sa silingan na mga dapit.
An Presidente nan JCI Wensie Surigao na si Aster Irene Go namahayag isab na noapil sila sa Coastal Clean Up kay isa sa tagpanhingusgan na programa sa ila organisasyon sa environment sanitation ug life underwater. Isip isa sa mga residente nan Surigao City ug kabahin sa komunidad sanan organisasyon panghinaut nija na unta an tanan an mamahimong concern sa kinaiyahan gumikan kay ini ra an nag-inusara na kalibutan nato.
Sa habig ni City Councilor Rise Faith Recabo, tagtudlo na noduol mismo sa ija buhatan an naglangkob sa Surigao Youth Convegence para sa paghangyo nan suporta sa amo na aktibidad lakip isab sa katujuan sa Sangguniang Panlungsod para sa pagpasar nan Ordinansa sa pagdili o paglimita sa paggamit nan plastic sa mga establisemento o grocery stores, an plastic an pinakadaghan na basura na nakolekta sa dihang taghimo an coastal clean up.
An isa sa mga nakuha na mga basura naglangkob sa mga plastic cellophanes, diapers, mga duwaan, sapatos, bag, inidoro, computer monitor sanan iban pa.
