Kapin 3,000 ka pamilya sa Davao del Norte, apektado sa pagbaha

Davao City – Liboan na ka mga pamilya ang naapektuhan sa lapad nga pagbaha sa pipila ka Local Government Units (LGUs) sa Davao del Norte tungod sa weather disturbance (Shear Line Weather System).

Sa interview sa DXDC RMN Davao kang Eric Rosillo, Operations and Warning Division Head sa Provincial Disaster Risk Reduction and Management Office (PDRRMO) Davao del Norte, iyang gibutyag nga muabot sa 1,100 ka pamilya o anaa sa 3,448 ka indibidwal ang apektado gikan sa munisipalidad sa Kapalong, Asuncion, New Corella, Braulio E. Dujali, ug Tagum City.

Matud ni Rosillo nga ang maong mga residente gilayong gihikling sa mga evacuation center ug gihatag usab og pasiunang tabang gikan sa lokal nga panggamahan ug Department of Social Welfare and Development (DSWD).

Dugang sa PDRRMO head nga taas usab ang lebel sa tubig ang nasinatian sa matag lokalidad, diin naapektuhan usab ang dalan, diin kagahapon daghang motorista ang na-stranded partikular na sa highway sa Carmen.

“Naay LGU nga lampas tao (ang tubig baha). Naa poy lugar nga waistline lang. Naa poy uban nga muabot og 15 feet. Generally, naa sa waistline pataas gyud ang pagbaha,” sulti ni Rosillo.

Sa pagsulat ning balita, ginaproseso na sa LGU sa Asuncion, New Corella ug Tagum City ang mga rekisitos aron sila makadeklara og State of Calamity.

RadyoMaN Kirby Manzon