Davai City- Mokabat sa 38,400 ka mga batang anaa sa 6 – 59 ka bulan
ang nabakunahan na og kontra tipdas dinhi sa dakbayan sa Davao base sa pinakaulahing report sa City Health Office kagahapong adlawa Enero 22.
Sa pakighinabi sa DXDC RMN Davao gibutyag ni CHO head Dra. Josephine Villafuerte nga target nila nga mahuman ang paghatag og vaccination nga MMR kun Measles, Mumps and Rubella ngadto sa mga wala pa nabakunahang mga bata karong Pebrero 7 ning tuiga.
Nagdeklara ang CHO og outbreak aron dili na mudaghan pa ang maigo sa tipdas sa dakbayan human nga paspas ang pagsaka sa kaso sa tipdas sukad niadtong bulan sa Nobyembre sa nilabayng tuig.
Nakatala og 204 ka suspected cases sa measles ug 18 ang kumpirmadong naigo niini nga sagad mga bata matud sa opisyal.
Gipaklaro ni Villafuerte nga ang uban sa mga pasyente dili taga-Davao City.
Sukad usab niadtong Nobyembre hangtod karong bulan sa Enero 12 na ang namatay tungod sa maong balatian.
Nag-house-to-house na ang mga personahe sa CHO sa pagbakuna ilabina sa Barangay 23-C Mini-forest ning dakbayan kinsa nakatala og adunay pinakataas nga suspected cases.
Tambag niini nga angay nga magpa-check up na dayon sa doktor kung adunay mga nakitang sintomas sa tipdas sama sa kalintura, skin rashes, sore eyes, bayuok, ubo og sip-on ug dili na paabutong mugrabe pa.
RadyoMan Aimee Guinita
