Dako ang pasalamat ni Brgy. Kapitan Gonzalo O. Galvez sa Basagan, Katipunan nga nasugdan na gayod ug semento ang dalan sa nahisgutan nga barangay.
Kini ang iyang gi-asoy atol sa pagbisita sa team sa Provincial Information Center sa project site niadtong Agosto 22 ning tuiga.
Matod ni Galvez, sa niaging tuig pa napasar ang resulosyon nga gihimo sa Liga ng Barangay sa lungsod sa Katipunan, sa termino pa ni Willie Wong, nga naghangyo ni Gov. Roberto Y. Uy alang niining proyektoha.
Dugang sa kapitan, kining 3.087 kilometros nga road concreting dako kaayo ug ikahatag nga kaayuhan sa ilang barangay tungod kay dugay na nga panahon nga gi-antos sa mga lumulupyo ang kadanlog sa dalan kon mag-ulan ug sobra usab ang abog kon ting-init.
Nasayran nga adunay pundong P15,900,000.00 ang maong proyekto gikan sa 20% development fund sa kagamhanang probinsiyal. Ang road concreting nagsugod sa Brgy. Daanglungsod padulong na ngadto sa section sa Brgy. Basagan.
Sumala sa Project In-charge nga si Norman Claros, target sa Area Engineer sa District II-A nga si Engr. Marvin Pangilinan nga humanon kini’g trabaho sa PEO (Provincial Engineering Office) sulod lamang sa 3 ka bulan. (PIC-elds)
