Pagadian City – Gilamoy sa kalayo ang kapin 50 ka balay dihang dapita sa Jamisola Extension, Purok Romblon, Brgy. Balangasan ning syudad Pagadian human niulbo ang dakong sunog alas 4:38 sa hapon niadtong sabado.
Usa ka oras og walo ka minutos nga nagkigbugno ang kabomberohan sa Pagadian City Bureau of Protection , una hingpit nga nakontrolar ang kalayo.
Aminado ang mga bombero nga naglisud sila pagmontar sa ilang mga gamit gumikan sa kahu-ot sa lugar, pas-pas usab nga nikatay ang kalayo kay gama man sa light materials ang mga balay.
Sa inisyal nga imbestigasyon nasayran nga nagsugod ang kalayo sa balay ni Flordelyn Emperial nga gi-abangan ni Ellah Kabuntalan.
Sa taho nga nahipos sa DXPR Pagadian, mosubra sa 74 mil ka pesos ang damyos ug kabatangan nga naabo sa maong insidente.
Walay gikataho nga namatay o samaran sa nahisgutan nga sunog, apan daghang pamilya ang nawad-an og panimalay gumikan sa hitabo.
Gipangita usab karon sa mga otoridad ang Kabuntalan kung diin didto nagsugod sa iyang kwarto ang kalayo aron masuta ang ugat hinungdan sa dakong sunog.
