Davao City – Mag-atubang og kaso ang duha ka indibidwal human naharang ang ilang gisakyang pick-up nga adunay dalang mga armas ug iligal nga droga sa Barangay Lacson checkpoint, Calinan District, Davao City pasado alas 10:00 sa buntag niadtong Sabado (September 25, 2021).
Sa interbyu sa DXDC RMN Davao kang Police Major Jake Goles, Chief of Police (COP) sa Calinan Police Station, giila niini ang duha ka dinakpan nga sila Michael John Lantoria, 40 anyos nga taga Cagayan ug kauban niining si Sebastian Quiblat, 61-anyos, taga Misamis Oriental diin nasayrang gikan Cagayan padulong General Santos City ang nahisgutan.
Saysay ni Goles, atol sa regular inspection sa kapulisan kauban ang Task Force Davao, nakuha sa posisyon sa mga dinakpan ang anaa sa 42 ka 9mm pistol ug 18 ka shotguns, wala pay labot ang personal nga dala niini, diin ang maong mga armas gipanag-iyahan sa usa ka security agency apan walay napakita nga Travel Authority / Permit to Transport sa naasoy nga mga armas.
“Tinitingnan din namin yung angulo kung ano din yung violation ng security agency na bakit nila pinayagan na mag-transport ng ganun na without any proper documents na gi-secure sa transport ng baril. Hindi ka pwedeng mag-transport once na security agency ka na wala kang transport permit na galing doon sa point of origin,” sulti ni Goles.
Nakuhaan usab ang mga suspetsado og lima ka pakete sa shabu nga mukantidad og P48,000. Gawas sa Republic Act (RA) 90591 (Comprehensive Firearms and Ammunition Regulation Act) nga atubangong kaso, mag-atubang usab ang mga dinakpan sa kalapasan sa Republic Act (RA) 9165 (Comprehensive Dangerous Drugs Act of 2002).
RadyoMaN Kirby Manzon
