Kapin 72 mil ka pesos nga kantidad sa drogang shabu, nakompiska, drayber nadakpan

Mukabat sa kapin 72 mil ka pesos nga kantidad sa drogang shabu ang nakompiska sa mga kapulisan samtang nadakpan ang drayber nga nagpayuhot niini atol sa drug buy-bust operation nga gipahigayon pasado alas 11:40 sa buntag kagahapon didto sa Purok-1, Barangay Bocboc, Don Carlos, Bukidnon.

Giila ang dinakpang suspek nga si Dionisio largo, alyas Nesio, 49 anyos, adunay kapuyo, drayber, ug residente sa Purok-Madasigon, Barangay Cabadiangan, Kadingilan, Bukidnon.

Napalit sa poseur-buyer ngadto sa suspek ang usa pakete sa gituohang drogang shabu nga mutimbang og 0.14 gramos ug mukantidad og P1,000.00.

Nakompiska usab ang lain pang duha ka dagkong pakete sa gituohang drogang shabu nga mutimbang og nuwebe (9) gramos ug gibana-banang anaa sa P61,200 ang kantidad niini.

Samtang laing pang lima (5) ka mga pakete sa shabu ang nakompiska nga mukantidad og P10,000 lakip ang usa ka kaha sa sigarilyo, usa ka unit sa Vivo nga cellphone, mga drug paraphernalia, usa ka unit sa Honda Single motor, ug kwartang mukantidad og P2,080.00 sa nagkadaiyang denominasyon.

Gidala na sa Don Carlos Municipal Police Station ang suspetsado alang sa tokmang disposasyon samtang giturn-over sa Provincial Forensic Unit sa Malaybalay City, Bukidnon ang mga nakompiskang ebidensya alang sa dugang eksiminasyon.

Kasong paglapas sa RA 9165 kon Comprehensive Dangerous Drugs Act of 2002 ang atubang sa dinakpang suspetsado.