Sikop ang usa ka negosyante nga taga lungsod sa Tamparan, sa Lanao del Sur ug ang kauban niini atol sa buybust operation, pasado alas-3:00 kagahapon sa hapon, Agosto 22, sa Barangay Marawi Poblacion sa Marawi City.
Kapin kun kulang usa ka kilo sa gituohang shabu, nga adunay gibanabanang market value nga dos milyones pesos, usa ka one thousand-peso bill nga buybust money, boodle money nga nagkantidad og P2.2 million ug lain-laing mga identification cards ug pitaka ang nakuha gikan sa target sa maong operasyon nga mao ang negosyante.
Giila ni Police Captain Jemar Delos Santos, information officer sa Police Regional Office BARMM, ang target sa operasyon nga si Alexander Dayondong Aliponto, taga-Tamparan, samtang ang iyang kauban nailang si Adam Pandiin, kinsa ilado sa alyas nga “Titing”, residente sa Marawi City.
Miingon si Marawi City Mayor Majul Gandamra nga giangkon ni Aliponto sa mga utoridad aduna siyay negosyo nga glass palace sa Tamparan apan ipasusi pa kini sa mayor sanglit dili man siya pamilyar sa maong tawo.
Posible, matud pa, nga nangita lang kini og alibay o excuse.
Ang maong joint operation gipahigayon sa Philippine Drug Enforcement Agency (PDEA) sa Bangsamoro Autonomous Region in Muslim Mindanao (BARMM), Marawi Police Station, 1403rd Regional Mobile Force Company ug 103rd Infantry Brigade, Philippine Army.
Gidayeg ni Gandamra ang PDEA ug uban pa’ng mga pwersa nga mihimo sa maong operasyon.
Dili, matud pa, niya itugot nga ang mga residente sa Marawi ug sa uban pa’ng mga munisipyo sa Lanao del Sur, mohimo og ilegal nga transaksiyon sa siyudad, ilabina kay anaa pa sila karon sa proseso sa pagbangon gikan sa pagkaguba tungod sa Marawi siege.
Ang mga suspek ug ang mga ebidensiya anaa na karon ilawom sa kostudiya sa PDEA BARMM.
