Kapin sa 16-M pesos, gin-alokar sang LGU– Pontevedra sa pagbakal sang COVID-19 vaccine!

7

Pontevedra, Capiz – Nagalab-ot sa P16 million pesos ang pondo nga gin-alokar sang local government unit sang banwa sang Pontevedra para sa pagbakal sang bakuna kontra sa COVID19.

Suno kay Mayor Esteban Evan ‘Dodoy’ Contreras, sa kabug-osan nga masobra 55 ka libo nga populasyon sang Pontevedra, target nila nga maturokan sang bakuna ang ginabanta 32 ka libo nga mga residente.


Aminado man ini nga kulang ang nasambitan nga alokasyon sang pondo apang tinguhaan nila nga matalapud ang tanan nga mabakuhan kontra sa COVID19.

Magadepende naman ang brand sang vaccine nga igaturok sa kun anu ang maaprobahan sang FDA, DOH kag gobierno nasyonal.
Ginpunto sang alkalde nga wala man sang pilitay sa pagpabakuna kontra sa COVID-19.

Apang base sa nahauna nga guidelines sang gobierno, kalakip sa mga igaprayoridad nga mabakuhan amo ang mga frontliners, PWD’s, mga may edad na nga mga persona kag ang mga membro sang 4Ps.

May kaangut sini, samtang wala pa sang bakuna, ginpahayag sang alkalde nga importante sa gihapon nga mag-andam ang tanan kontra sa amo nga virus kag sundon ang mga health protocols.




Nagakadapat man nga pabakuron ang immune system paagi sa pag-inum ukon pagkaon sang mga pagkaon nga may presensya sang vitamins C kag Zinc.

Facebook Comments