Kapin sa 50 ka mga support groups ni Presidente Rodrigo Duterte, andam na sa himoong rally karong Sabado.

14
Andam na ang United for Democracy and Duterte Supporters Group (UDDS)-Worldwide nga mopahigayon ug rally, isip pagpakita og suporta kang president Rodrigo Duterte, taliwa sa mga isyu nga giatubang niini ug sa taho may labot sa distabilisasyon.

Ang UDDS, maoy kahugpungan sa kapin sa 50 ka mga support groups ni president Duterte diin dinhi sa Sugbu, himoon ang rally sa Plaza Independencia karong adlaw nga Sabado, alas-11:00 sa buntag.

Matod ni Atty. Enric Rama sa People’s Initiative for Federalism, nga tinguha nila nga maprotektahan ang presidente ug ang boto sa katawhan, batok sa gikatahong lakang nga kini palagputon sa iyang katungdanan.

Gitug-an usab ni Dr. Rowena Burden sa grupong Cebu For Duterte, nga sa dili pa sila magtapok sa Plaza Independencia, mohimo una ang grupo ug caravan gikan sa South Road Properties (SRP) ug sa Parkmall sa dakbayan sa Mandaue.

Gibana-bana ni Burden nga moabot sa 10,000 ka mga tawo ang mosalmot sa maong kalihukan, diin pag-abot sa venue ang grupo mohimo ug pag-ampo ug maminaw sa mga speakers gikan sa mga leader sa nagkadaiyang support group ni Duterte.

Alang kang Burden, seryoso nga hisgutanan ang giingong destabilization plot batok kang presidente Duterte ug angay nga protektahan sa katawhan ang ilang mga boto sa niaging eleksyon.



Facebook Comments