Arestado ang suspek, samtang nasakmit ang kapin kun kulang 200 gramos nga shabu sa gihimong anti-drug buy-bust operation sa mga pulis sa Marawi City, pasado alas-3:00 kagahapon sa hapon.
Gibana-banang aduna kini market value nga 1.3 million pesos.
Sa inisyal nga police report, na-ila ang dinakpan nga si Walid Nasser Usman, 32 anyos, residente sa Barangay Adapun Ali, sakop sa lungsod sa Baloi, Lanao del Norte.
Sakay sa kolor orange nga Yamaha Aerox, nasikop sa mga utoridad ang suspek sa may barangay Tampilong sa Marawi City.
Miingon ang investigator sa Marawi police nga si Police Staff Sergeant Amador Rosales, lll, nga ilang gisundan gika’g Iligan City and suspek.
Wala pa naklaro kung asa gikan niini ang iyang dalang droga apan gawas sa gituohang shabu, nakuha gikan kang Usman ang iyang driver’s license, ang iyang sakyanan ug Lanao del Sur provincial jail nga identification card.
Temporaryong na-detain karon sa Marawi detention cell ang suspek samtang gihikay ang kasong paglapas sa Republic Act 9165 o Dangerous Drugs Act batok kaniya. (Divina M. Suson, March 9)
