Panay, Capiz – Apat ka mga barangay officials sang Barangay Linao, Panay ang ginpasakaan sang kaso sang mga katapo sang CIDG-Capiz bangud sa anomalya sa distribusyon sang Special Amelioration Program ukon SAP sang gobyerno.
Kaso nga paglapas sa RA 3019 ukon Anti-Graft and Corrupt Practices Act kag RA 11469 ukon Bayanihan to Heal as One Act ang ginpasaka kontra sa mga respondents nga sanday Punong Barangay Tito Dipon Banuevo; Barangay Kagawad Cleope Barroa Billanes; Barangay Secretary Marcelyn Balatayo Bibal kag Barangay Treasurer Teresa Villanueva Arabia.
Nahibaluan sa ginpatigayon nga imbestigasyon sang CIDG-Capiz nga ginpang-ibanan sang 950 pesos kag 3, 210 pesos ang nakuha nga SAP sang duha ka mga benepisaryo sang nag-claim ang mga ini sang ayuda sang nakaligad nga Abril 27, 2020.
Paagi sa pagpatikasog sang nasambitan nga mga opisyal sang barangay, ang nasambitan nga kantidad nga ginkuha sa mga tagreklamo ang igahatag sa mga persona nga wala makabaton sang kasubong nga ayuda.
Samtang separado naman nga administrative case bangud sa pagbayolar sa RA 6713 ukon Code of Ethical Standard of Public Officials ang gin-refer na sa Office of the Ombudsman para sa nagakaigo nga aksyon.
