Davao City — Gipaniguro ni Barangay 76-A Kapitan Rolando Trajera nga mahatagan og bag-ong Food and Medicine (FM) pass ang mga residente’ng wala na nagbaton sa maong passes nga subling gamiton sugod Nobyembre 17, 2020 subay sa Executive Order (EO) No. 62 sa City Government of Davao.
Sa interbyu sa DXDC RMN Davao kang Kapitan Trajera, gibutyag niini nga mangayo sila’g bag-ong FM pass sa City Government of Davao human nga kadaghanan sa ilang mga residente wala nay FM pass ug wala nagdahum nga kini subli’ng gamiton.
“Ambot lang kung unsaon ni sa City (Government of Davao) kay kami, natural amo gyung hangyoon nga ang majority (sa among residente), wala nay FM pass. So, mangayo gyud ‘mi og additional nga kopya para mahatag pud nato sa uban nga wala nay FM pass,” segun ni Trajera.
Nagtuo ang kapitan nga dako og ikatabang ang subling paggamit sa FM pass aron makontrola ang lihok sa tawo ug aron masolusyonan ang padayong pagtaas sa kaso sa Coronavirus Disease 2019 (COVID-19) sa dakbayan.
RadyoMaN Kirby Manzon
