Davao City – Hingpit gipasakan og kaso sa Sasa PNP sa buhatan sa piskalya ang kapitan sa usa ka barangay sa Kidapawan City North Cotabato gumikan sa pagdala og pistola nga walay lisensiya.
Kalapasan sa Republic Act 10591 kun Comprehensive Firearms Law ang gipasang-at nga kaso batok kang Kidapawan City Barangay Sto.Niño Kapitan Albert Espina sa kapulisan sa Sasa kagahapon adlawa.
Positibo ang Sasa PNP nga makitaan og probable cause sa piskalya ang kaso nga gipasaka batok sa kapitan gumikan sa lig-on nga ebidinsiya nga gisumite.
Gidakop ang kapitan human nakita ang .45 pistol sud sa iyang sakyanan atol sa pagrekisa sa Davao International Airport Police Community Office ug Regional Public Safety Battalion.
Dihang gipangayoan og papeles sa kapulisan ang kapitan pakyas kini sa pagpresenta ug nasayran nga expired na diay ang permit to carry nga gidala sa suspek.
Alayon ani, gikatakda ipailawom sa ballistic forensic examination sa Crime Laboratory 11 ang pistola aron masuta kun nakapaboto ba ang armas o wala.
RadyoMaN Joel Viray
