Davao City – Gisaysay ni Marilog District Brgy. Salaysay Kapitan Robert Itdang kung unsa ka pait sa usa ka gamay nga barangay nga dyutay lang ang madawat nga Internal Revenue Allotment (IRA) matag tuig.
Segun ni Itdang, wala gayoy mahimo nga proyekto ug serbsiyo sa katawhan ang gamay nga barangay kay bisan gani ang honorarium sa mga opisyal hasta raman pod gamaya.
Dili sama sa dagku nga mga barangay hilabi na kun daghan og mga negosyo dagku usab ang madawat nga IRA nga maoy gamiton sa proyekto, mga programa ug honorarium.
Busa dili magduha-duha og suporta si Itdang kun himoong regular ang sweldo sa mga elected opiyales, mga auxiliary ug uban pa.
Lantaw ni Itdang nga kun ihinayon ang paghatag og regular nga sweldo sa mga opisyales sa barangay, mas daku unya ang ilang mahimo nga proyekto ug serbisyo alang sa katawhan sanglit dili naman unya makibrahan ang IRA alang sa personnel expenses.
Positibo si Itdang nga mas mahimo pang produktibo ang mga opisyales ug mga functionaries sa ilang mga trabaho ug pagpangalagad sa katawhan kun mapursige ang regular nga suhulan inay nga honorarium system lamang.
RadyoMaN Joel Viray
